23 Jul 2006
کارواش
"ایستی دی بورا"
دوروب باشقا بیر صندلده اوتوردو و دووارداکی رسیملره باخدی نازلی. رسیملردن بیریسی چیمنلیکده پارک اولونموش، پاریلدایان بیر ماشین ایدی.
" یوز ایل بوندان قاباق بو ماشینین یئرینه آت یا قاطیر باغلانارمیش"
و بو فیکیردن سونرا قارنیندا، آغیر بیر تورش شئی توولاندی.
"یوز ایل بوندان سونرا من ده اولمایاجاغام"
گلهجهیی و گلهجکده باش وئرهجکلری گؤرهبیلمهیهجهیینه گؤره، او چاغین آداملارینا قیسقاناردی هر زامان. گولونج بیر فیکیر بئینینه ساچدیقینا گؤره دوداغی قاچدی:" ماشینی اوتلاماغا چیمنلییه بوراخیبلار". ماشینین نئجه اوتلاماغی، آغناماغی، آنقیرماغی و گؤووشهمهیینه فیکیرلشدیکده، اورهیینده سرین بیر مئهین اسدیینی دویدو.
ساغ قیچینی سول قیچینین اوستونه ییخدی، او حالدا بودونون دریسینین چکیلمه سینی حیس ائتدی.
" خاملامیشام".
دونن بایرامین اون اوچونجو گونویدو و چؤله چیخدیقلاریندا چوخلو آتیلیب دوشموشدو، بو گون یوخودان آییلاندان بری، ووجودوندا درین یورقونلوق حیس ائدیردی.
اورا بؤیوک بیر کارواش ایدی. تبریزین ان بؤیوک کارواشی. ایشچی لرینین سایی سی چوخ اولدوغونا گؤره، ماشینلارین یووولماسی چوخ آز سوروردو، بوندان اؤترو موشتریسی چوخ اولوردو. کارواشین حهیطینین بیر بوجاغیندا، بالاجا بیر اوتاق تیکیلمیشدی، موشتریلر اوردا راحاتجاسینا اوتوروب، ماشینلارینین یویولماسینی گؤزلوردولر. بیر نئچه صندل، بیر بخاری ودووارلاردان آسیلمیش بیر_ ایکی رسیمله دولدورموشدولار اوتاغی.
نازلی دوروب اوتاغین بؤیوک پنجره سیندن ایشچیلره و اونلارین ایشلهمهیینه باخدی. اؤزونو اونلاردان بیریسینین یئرینه قویدو.
" ماشینین قاباق شوشهسینی یوماقینین آیری کئفی وار".
ماشینی یووان آریق ایشچی، قاباق شوشهنی الیندهکی دسمالنان کؤپوکله تدی، سونرا کاپوتو، چاتینی و قاپیلاری دا. ماشین، کؤپویه بوروندو.
"گؤر نه کئف چکیر. آدام گیره حاماما، بیری ده آدامی یویوندورا"
ماشینی اوجادان کیشنه دی و تشککورله دولو اولان گؤزلریله اونو قشوولایان ایشچییه باخدی.
"ایندی ده نوبه کؤپوک لری یوماقدادی "
آریق ایشچی، اوزون بیر فیشقیردیجی شیلانقی الینه آلیب ، ماشینی دیققتله یوماغا باشلادی. سویون اینجه- اینجه دامجیلاری ماشینین اﯙزونه دَیدیکجه یئنیدن گؤیه سیچراشیردیلار. ماشینلا ایشچی نین آراسیندا گؤی قورشاقینا بنزر بیر شئی یارانیردی.
"به به".
بؤیوک کارواش ایکی یئره بؤلونموشدو. بیر طرفده ماشینلاری یویوب، اوبیری طرفده قورودوردولار. نازلی ماشینینی ساخلاییب آریق ایشچی یه بیر بئش یوز تومنلیک وئریب "آچاری قویدوم اوستونه، قوروداننان سورا منی چاغیر" دئمیشدی.
آریق ایشچینین باخیشی " گؤزوم اوسته" دییهرک، قیزین بوینونون آغ دریسینه سورونموشدو.
"گؤزووه تیکان باتسین، گؤزووه تیکان باتسین، گؤزووه تیکان باتسین"
اورهیی بولانارکن، نازلی چؤنوب قارا شوشهلی اوتاغا ساری گئتمیشدی و آریق ایشچینین باخیشینین تپهدن دیرناغیناجان سورونولمهسینی ایرگَنه ایرگَنه حیس ائتمیشدی.
"بی شرف کؤپئی اوغلو"
جاوان بیر اوغلان گونون آلتیندا دوروب، ماشینینین قورودولماسینی گودوردو.
" ایشیم قوتاراناجان بیری گلمهسه بورا، یاخچی اولار"
صندلین اوزه رینده ادبلی قیزلار تکین اوتوروب و کیشی لرین گؤزآلتی باخیشلارینی سایماماغا دای حؤصلهسی قالمامیشدی.
آغ بیر ماشین کارواشا گیردی. او قدر ده باتیق_بولاشیق ده ییلدی نازلی جا. ماشین یویولان طرفده دایاندی. سوروجوسو ائنیب ایشچیلرین بیریسیله دانیشاراق ماشینین اوزهرینده بیر_ایکی یئری گؤرستدی. سونرا ایسلانماسین دییه کارواشین حهیطینه دوغرو یئریدی. بو جاوان اوغلانی نازلی دؤرد یاشیندان تانیردی.
بیرلیکده اوشاقلار باخچاسینا گئدهردیلر. او زامان پوتا بیراوغلانجیق اولاراق، یاشیدلارینی دؤیوب اونلارا زور دییهردی. اؤزونه دسته قوشون قوروب شاهلیق ائلردی. اونون قوشونونون بؤیوک تفرئحی، قیزلاری قورخوتماق و معللیملرینین گؤزوندن ایراق، اونلاری دؤیمک ایدی.
نازلی او اوغلانی تای- توشلارینین یانیندا دؤیدویونو هئچ زامان اونوتمازدی. اوشاقلیغی نین ان شیرین خاطیره لریندن بیری ایدی. ان پارلاق خاطیره سی.
دفعهلرجه دیسکیندییی ودؤیولمهسینین عوضینی بیر یوموروقدا چیخمیشدی. اؤزوده قارنیندان. فقط بیر یوموروق. اوغلانجیق یئره ییخیلیب آغلایا آغلایا قیوریلمیشدی. اوشاقلار معللیمی چاغیرماغا قاچمیشدیلار.
بئله بیر دوروما بیلدیر ده راست گلمیشدی. دﯙز بایرامین اون دؤردونجو گونو. باشقا کارواشدا همن اوغلانی گؤرموشدو. اونو گؤرمک او قدر ده گؤزلهنیلمز دهییلدی. بیلی یوردوندا یا آبرساندا یادا ولی عصرین شانزهلیزهسینده اوز- اوزه گلردیلر گاهدان . اما هئچ زامان بیر- بیرینی تانیدیقلارینی اوزلرینه گتیرمزدیلر هئچ بیریسی.
یادینا گلدییی قدر بیلدیر ده ائله بو ساعاتلاردا، دؤرد- دؤرد یاریم میزانیندا، کارواشا گلمیشدی.
"آیدین... آیدین نم نمنه".
آیدین، ماشین قورودولان طرفده دوران جاوان اوغلانا ساری گئدیب اونو چاغیردی. ایکی جاوان بیر بیرینی قوجاقلاییب اؤپوشدولر.
"تانیش چیخدیلار"
اؤز ماشینینا باخدی. آریق ایشچی ماشینا مینیب، قوروتما بؤلومونه ساری سوردو. آچارینی اونا وئردییی اوچون اؤز الیندن حیرصلی ایدی.
" حارامون اولسون او بئش یوزلیک "
کارواشا ایکی عسگر گیریب، کارواشین مودورلویونه- بالاجا بیر اوتاق، تام حهیطین اورتاسیندا- ساری دوغرولدولار. بیریسینین الینده بیر پیتیک واریدی، ایکیسی ده فانوسقالارینا قولباغی تاخمیشدیلار. پاریلدایان قولباغیلار.
بیر آن غریبه بیرحیس نازلینی بورودو. آیاقلارینین یئردن قوپوب، هاوادا آسلاق قالدیغینی ساندی. اؤلدویونو حیس ائتدی. بؤیوک جامین دالیندان دیریلرین بوش بوش چالیشمالارینی ایزلهییردی سانکی.
" آآآ... اؤلوم بئله بیر شئی اولمالی ها: بؤیوک بیر شوشه قاپی، قارامتیل بیر شوشه. قاپی نین بوتاییندان اوتایی گؤرسهنیر آما ترس طرفدن ساده جه قارا بیر آغیز گؤرونور."
اؤزونو بیر صندلین اوستونه ییخیب قاپینی آچابیلیب درین نفس آلابیلدییینی آرزولادی.
" اؤلورم. آیدین گلیب قاپینی آچسایدی بیر آز تزه هاوا گلردی بورا".
ماشینینا باخدی. آریق ایشچی الکتریک سوپورگه ایله ماشینین ایچینی سوپوروردو. مودورنن بیرلیکده عسگرلر، آریق ایشچی یه دوغرو گئدیردیلر.
" نه خبر دی؟ نه اولوب؟"
آیدین لا جاوان اوغلان دانیشا دانیشا قارا شوشه قاپییا ساری گلیردیلر. ایچری گیرمهدن قاپی نین آغزیندا دوردولار .
"گرک گئدم آچاریمی آلام"
آیدین قاپینی آچدی، نازلینی گؤرهرک اؤزونو گؤرمهمزلییه ووردو.
" ااااه ایندی گؤزومون قاباغیننان چکیلسهلر"
عسکرلرین هارا گئتدیکلرینی گؤرمهیه تلسیردی. جاوانلار بوش صندللره دوغرو گئتدیلر. نازلی ماشینینی آختاردیقدا آریق ایشچینی رولین آرخاسیندا گؤردو. عسگرلر ماشینین آردینجا قاچیردیلار و اوجادان "دور، دور" دئییردیلر.
" ائلهبیل بوصحنهنی نئچه یول یوخودا گؤرموشم".
